ԼԵՆԳՍԹՈՆ ՀՅՈՒԶ

ԼԵՆԳՍԹՈՆ ՀՅՈՒԶ
(1901-1967)

Աֆ­րիկ­յան ծագ­մամբ ա­մե­րի­կա­ցի գրող, ար­ձա­կա­գիր, բա­նաս­տեղծ և հ­րա­պա­րա­կա­խոս: Հա­մար­վում է Ջա­զա­յին պոե­զիա­յի սկզբնա­վո­րող­նե­րից մե­կը և «­Համ­լետ­յան վե­րած­նունդ» մշա­կու­թա­յին շարժ­ման ա­ռա­ջա­տար գրող­նե­րից մե­կը:

ԵՐԱԶԱՆՔՆԵՐ
Ամո՛ւր պահեք երազանքները,
Քանզի եթե նրանք մահանան,
Կյանքը կնմանվի թևը կոտրած թռչնի,
Որ չի կարողանում թռչել:
Ամո՛ւր պահեք երազանքները,
Քանզի երբ նրանք հեռանան,
Կյանքը կդառնա անբերրի հող՝
Ձնից ցրտահարված:

ՀԱՄԵՍՏ ԱՂՋԻԿ
Թե չլինեին քո աչքերը,
Ես կհամեմատեի քեզ
Առանց աստղերի գիշերվա հետ:
Թե չլինեին երգերը քո,
Ես կհամեմատեի քեզ
Առանց երազի քնի հետ:

ԵՐԱԶՆԵՐԻ ՊԱՀԱՊԱՆԸ
Դո՛ւ, երազող,
Բե՛ր ինձ բոլոր երազանքներդ,
Բե՛ր ինձ բոլոր մեղեդիները սրտիդ,
Հեռու աշխարհի անչափ կոպիտ ձեռքերից՝
Ես կարող եմ փաթաթել նրանց
Կապույտ ամպի կտորով:

ԱՊՐԻԼՅԱՆ ԱՆՁՐԵՎԻ ԵՐԳԸ
Թող անձրևի արծաթե կաթիլներն
Իջնեն գլխիդ ու համբուրեն քեզ,
Թող անձրևը օրորոցային երգի քեզ համար:
Ես սիրում եմ անձրևը,
Որ ջրափոսեր է ստեղծում մայթերին,
Որ ջրհորներ, հորդացող ջրափոսեր է ստեղծում,
Որ գիշերով փոքրիկ օրորոցային է երգում մեր տանիքներին:

Թարգմանությունը անգլերենից՝
Գոհար ՂԱՍԱԲՅԱՆԻ