Դեկտեմբերի 2-ին Ավ. Իսահակյանի անվան կենտրոնական գրադարանում տեղի ունեցավ արձակագիր, հրապարակախոս, թարգմանիչ Գրիգոր Ջանիկյանի 80-ամյակին նվիրված հոբելյանական ցերեկույթ: Ողջույնի խոսքով հանդես եկավ գրադարանի տնօրենի ժ/պ Ռուզաննա Բարսեղյանը՝ հոբելյարին փոխանցելով գրադարանի ուղերձը: ՀԳՄ նախագահ Էդվարդ Միլիտոնյանը ներկայացրեց Գրողների միության ուղերձն՝ անդրադառնալով հոբելյարի գրական, հրապարակախոսական ու թարգմանական գործունեությանը, հրատարակած գրքերին ու արժանացած մի շարք գրական մրցանակներին: «Գրիգոր Ջանիկյանը գրական-գեղարվեստական իր հմտությամբ պատմական ու փաստագրական թեմաներին նոր շունչ է հաղորդում, ունի իր յուրահատուկ հայացքը»,- նշեց նա:
Գրականագետ, բ.գ.դ. Պետրոս Դեմիրճյանը խոսեց Գրիգոր Ջանիկյանի անհատականության, «Գրական թերթ»-ում համատեղ աշխատանքի ու ստեղծագործության մասին՝ բնութագրելով նրան որպես «ակունքներ որոնող ու ապագայի հետախույզ»:
Արձակագիր Ալիս Հովհաննիսյանը պատմեց Գրիգոր Ջանիկյանի հետ գրական սերնդակցության, իրենց սերնդի առանձնահատկությունների ու գործունեության մասին: Գրականագետ Կարո Վարդանյանը Գրիգոր Ջանիկյանի գրականությունը բնորոշեց որպես «հիշատակության արժանի սխրանք», անդրադարձավ նրա առանձին գրքերին, դրանց հրատարակությանն ու այնտեղ արծարծված ցեղասպանության, ինչպես նաև ազգապահպան ու հայրենասիրական հույժ կարևոր ու արդիական թեմաներին:
«Ֆրիտյոֆ Նանսեն» հիմնադրամի համակարգող Հայարփի Պետրոսյանը խոսեց Գրիգոր Ջանիկյանի մասին Ֆելիքս Բախչինյանի գրած հոդվածների և նրա անավարտ մնացած արժեքավոր մենագրության մասին:
Հայաստանի ազատագրության հայ գաղտնի բանակի (ԱՍԱԼԱ) անդամ Վազգեն Սիսլյանը նշեց Գրիգոր Ջանիկյանի գրքերի մեջ հայ դատին և իրենց գործունեությանն անդրադառնալու և դրա կարևորության մասին: Դերասանուհի Հասմիկ Տեր-Կարապետյանը խոսեց Ջանիկյանի ստեղծագործությունների հիման վրա գրված ռադիոբեմադրությունների մասին: Ջերմ ու սրտառուչ խոսք ասաց Գրիգոր Ջանիկյանի թոռնուհի Քնարիկ Շմավոնյանը:
Հոբելյանական ցերեկույթը վարում էր Գայանե Սամվելյանը: Ավարտին ելույթ ունեցավ Գրիգոր Ջանիկյանը: Նա շնորհակալություն հայտնեց հնչած ելույթների, բարեմաղթանքների ու մեծ գնահատանքի համար, խոսեց իր ապագա ստեղծագործական ծրագրերի միասին և գրադարանին նվիրեց իր նոր հրատարակած գրքերը:
ՎԱՍՏԱԿԱԾ ՀՈԲԵԼՅԱՆ
