Մայիսյան պայծառ օրեր են:
Այգում ճերմակ, պուրպուր, դեղին վարդերի տոն է: Անկեղծ խոստովանենք` գրողին համավարակը չի սպառնում. ճերմակ թուղթն ու գրիչը պարտադրում են մնալ տանը, առանձնանալ…
Գրողի ստեղծագործական խոհանոցը անհատական է, սակայն մեկուսացումը պարտադիր պայման է: Բալզակը գրում էր` ամբիոնի մոտ կանգնած, սուրճի անթիվ գավաթներով: Չէ՞ որ պետք է հասցնել բավարարել հրատարակիչների պահանջը…
Այս գարնանն էլ բնորոշ է անկայուն եղանակը: Տեղատարափ անձրևների շնորհիվ ամենուր հուռթի կանաչ է, տոն` այծերի, գառնուկների, ձիերի համար:
Մեր փոքրիկ այգին վկայում է, որ այս տարի առատ բերք կլինի` կեռաս, բալ, ծիրան, թուզ…
Ինչ մնում է համավարակին, գրիպի վիրուսները հայտնի են մարդկությանը դեռ անցյալ դարի սկզբից:
Մանրէաբան գիտնականները վկայում են, որ վիրուսները, մուտացիայի ենթարկվելով, կլինեն մարդկության ուղեկիցը: Պետք է պահպանել համակեցության կանոններն ու հարմարվել:
Մեր կյանքի ընթացքում այնքան դժվար օրեր են եղել, որ, պարզ է, սրանք էլ կհաղթահարենք:
Արցախյան ազատամարտի օրերին ծանր վիճակում էր ողջ հայ ժողովուրդը: Մութ և ցուրտ տարիներին ամերիկյան օգնությունը` աղի կարագ, ձեթ, լոբի, որոշակի փրկություն էր տնտեսական կոլապսի պայմաններում: Փակ սահմաններ, ցուրտ ձմեռներ:
Միակ լույսի շողը մեր բանակի հաղթանակներն էին և են:
ԵՊՀ-ում բուժպատրաստում էինք անցել, և ես շատ էի ցանկանում մեկնել ճակատի առաջին գիծ, լինել բուժքույր: Մեղավոր էի զգում, որ չիրագործեցի այդ ցանկությունը:
Այսօր մենք մենակ չենք այս համավարակի դեմ:
Վախերն ու հուսահատական տրամադրությունները ոչնչով չեն օգնի հաղթահարելու դժվարությունները:
Յուրաքանչյուր օրն ու ժամը մեր կյանքի ժամերն են, և թե ինչով կիմաստավորենք, պատասխանատու ենք ամեն մեկս:
Ես համոզված եմ, որ հետո, որպես հուշ, վարդագույն կներկենք մեր կյանքի այս հատվածը:
Իսկ համավարակի լավագույն հետևանքը կլինի, որ ազգային պետությունների քայքայումը կանգ կառնի:
Մարդկությունը պետք է պահպանի թե՛ բնության յուրօրինակությունը և թե՛ յուրաքանչյուր ազգի, ժողովրդի անհատական դիմագիծը: Եվ փոքր պետությունները, որոնց թվին է պատկանում Հայաստանը, դուրս կգան ամենափոքր կորուստներով:
Աշխարհի բոլոր անկյուններում բնակվող հայը փորձում է օգնել թե՛ իր հարևանին, թե՛ իր Հայրենիքին:
Եվ դա հիանալի է:
