ԳԱՂՏՆԻՔՆԵՐԻ ՍԱՀՄԱՆԱԳԾԻՆ
Հոկտեմբերի 21-ին ՀԳՄ կլոր սրահում տեղի ունեցավ Տեր Թովմա քահանայի (Վահան Անդրեասյան) «Գաղտնիքների սահմանագծին» գրքի շնորհանդեսը: Այն սկսվեց Տեր Թովմայի օրհնությամբ: Գիրքը տպագրվել է ՀԳՄ հրատարակչությունում:
ՀԳՄ նախագահ Էդվարդ Միլիտոնյանը ողջունեց ներկաներին, խոսեց Տեր Թովմա Անդրեասյանի գրական գործունեության, ինչպես նաև նոր հրատարակված գրքի մասին: «Թովմա քահանա-Վահան Անդրեասյանը ինքնատիպ, շնորհալի բանաստեղծ է, և այն նրա բազում շնորհներից մեկն է: Նրա նուրբ, գեղեցիկ, տեսանելի և անտեսանելի բանաստեղծական աշխարհը ներկայանում է որպես գաղտնիք, և իր գրքերում նա բացահայտում է այդ գաղտնիքները»,- նշեց Էդ.Միլիտոնյանը:
Գրքի խմբագիր Շանթ Մկրտչյանը խոսեց հեղինակի ու նրա ստեղծագործական ոճի մասին՝ անդրադառնալով գրքում ներառված ստեղծագործություններին: «Վահան Անդրեասյանի բանաստեղծությունները կարծես մի նոր լույսի տակ են առնվում ընթերցողի տեսողության մեջ, այն, ինչը թաքուն էր, հեռու և սկսում է երևալ իր խորքային կարևորությամբ և ամբողջացնելով պոետական հղացումը: Ամեն տողից հետո մի նոր տարածք է բացվում. դա է գրքի ամենամեծ նվաճումներից մեկը»,- նշեց նա:
Հակոբ Մովսեսը խոսեց բանաստեղծության, ժամանակակից աշխարհում նրա դրսևորումների, ինչպես նաև արդի հայկական բանաստեղծության մասին՝ արժևորելով Տեր Թովմայի ստեղծագործության հոգևոր բնույթը այդ համատեքստում. «Նրա բանաստեղծությունը մեղմ է, գրաֆիկական՝ արտահայտված մանրագծերով, և դրանք ներքին ընթերցանության համար են: Ուրախալի է, որ այսօր էլ բաբախում է պոեզիայի սիրտը, և գրվում են բանաստեղծություններ մարդկային ապրումների, ներաշխարհի մասին: Վահան Անդրեասյանի բանաստեղծություններում հրաշքները շատ են, իր օգնությամբ են տեսանելի դառնում, իր մասնակցությամբ տեսնելուց հետո մենք հավատում ենք դրան»:
Հերմինե Նավասարդյանը նշեց. «Տեր Թովմայի ստեղծագործական աշխարհում այն, ինչ բառերին չի տրվում, արտահայտվում է երաժշտությամբ, այն ինչ երաժշտությամբ չի հնչում, աղոթքով է հառնում, և այդ ամենը միտված են մարդու հոգևոր աշխարհի զարգացմանը»:
Շնորհավորելով գրքի հրատարակման առթիվ՝ Արսեն Համբարյանը խոսեց Վահան Անդրեասյանի բանաստեղծությունների նրբության և երաժշտականության մասին: Եսթերը շնորհակալություն հայտնեց Տեր Թովմային ոչ միայն իր ստեղծագործությունների, այլև հոգևոր գործունեության համար:
Շնորհանդեսի ընթացքում Գ. Սունդուկյանի անվան ազգային ակադեմիական թատրոնի դերասան Սամվել Բաղինյանը բանաստեղծություններ ընթերցեց գրքից: Բանաստեղծություններ կարդաց նաև Սաթենիկ Ղազարյանը:
Տեր Թովման խոսեց իր գործունեության ու ստեղծագործությունների մասին և պատասխանեց ներկաների հարցերին: Բանաստեղծի ու հոգևորականի նրա խոսքը լի էր իմաստությամբ ու լույսով. «Խաղաղությունը մշտապես ինձ հետ է: Եկեղեցում դու ամրոցի՝ տապանի մեջ ես, կարծես չորս կողմը մրրկալից ծով լինի, բայց դու նավի մեջ ես, և ոչինչ քեզ չի սպառնում: Տիեզերքը գաղտնիք է: Գիտնականները օրենքներ են հայտնագործում, դրանք գործում են, բայց արդյոք այդ համակարգերը ճի՞շտ են: Կա զուգահեռ աշխարհ, և այդ գաղտնիքների սահմանագծի մասին է գիրքը»:
Սեփ.լրտ.
