Եվրոպայի հնագույն տպագրատներից մեկը՝ 1892 թ. հիմնադրված КЊИЖЕВНА ЗАДРУГА (ՍԵՐԲԻԱՅԻ ԳՐԱԿԱՆ ԸՆԿԵՐԱԿՑՈՒԹՅՈՒՆ) հրատարակչությունը, «Փոքր գրադարան» մատենաշարով լույս է ընծայել բանաստեղծ Գագիկ Դավթյանի ստեղծագործությունների ժողովածուն «ПРЕПИРКА С JОВОМ» («ՎԵՃ ՀՈԲԻ ՀԵՏ») խորագրով:
Գիրքը Գ. Դավթյանի «Свидание времен» («Ժամանակների ժամադրություն») ռուսերեն ժողովածուից և «Poésie contemporaine Arménienne» («Արդի հայ պոեզիա») ֆրանսերեն անթոլոգիայից ճաշակավոր ընտրությամբ թարգմանել է սերբ ականավոր բանաստեղծուհի Լյուբիցա Միլետիչը: Գրքի խմբագիրն է բանաստեղծ Դրագան Լակիչևիչը: Շապիկին օգտագործված է նկարիչ Ժիրայր Աղավելյանի «Աստղապար» կտավը, ձևավորումն իրականացվել է ЦРНО МАРКОВИЋ գրաֆիկական ստուդիայում: Ժողովածուն Գագիկ Դավթյանի՝ արտերկրում տպագրված յոթերորդ գիրքն է:
