***
Նա իրեն ոչ մեկին չերևացող ուրվական էր թվում:
***
Ապագայի երաժշտության տակ ոչ բոլորն են կաքավելու:
***
Դեմքը թաքցնելու լավագույն միջոցը մերկ քայլելն է:
***
Նա ինքն իրեն փրկագնեց գերությունից, բայց իր ստրուկը դարձավ:
***
Պատահում է` դրոշակակիրը լեղապատառ փախչում է դրոշակից:
***
Գերբնակեցման արդյունքը.
մեկ մարդու մեջ ապրում է լիքը մարդ:
***
Նա հանցագործ է` սպանել է ինքն իրեն:
***
Որքան մարդու երևակայությունը վառ է, այնքան ինքն իրեն թշվառ է զգում:
***
Ուժը սարսափելի է իր ճղճիմ թուլություններով:
***
Ուշադրությո՛ւն, ուրիշի բախտի անիվի տակ մի՛ ընկնի:
***
– Ա՛խ, թե նորից բիձա դառնայի,- շշնջաց թարմ մեռելը:
***
Հարցերդ օտար աստվածներին հղիր` նրանք քեզ կլսեն առանց հերթի:
***
Երբ քամի չկա, տաճարի հողմացույցը ևս իր կարծիքն ունի:
***
Օտար լեզու չիմացողը երբեք չի հասկանա, թե լռությամբ ի՛նչ են ուզում ասել օտարերկրացիները:
***
Գազաննե՛ր, բոլոր ճագարներին անխտիր մի՛ կերեք. եթե հանկարծ փորձաճագարները չհերիքեն, ինքներդ գիտեք` ի՛նչ կլինի:
***
Ինձ դուր են գալիս նրանք, ովքեր առանց ծնողների օգնության էլ լույս աշխարհ կգային:
***
Միայն աշխարհի արարումից հետո այսքան անավարտ գործերի անդունդ առաջացավ:
***
Գեղեցիկ չէ մարդուն կասկածելը` լրիվ համոզվածության դեպքում:
***
Կայսրերին սովորաբար սպանում են ընկերները, զի թշնամիներ են նրանք:
***
Մենք անձա՛մբ կփչենք մեր առագաստները:
***
Թույլատրե՛ք` կույրերը ևս պահմտոցի խաղան:
***
Իմ ընկերներից քանի՛սը ինձ թշնամացան, որքա՛ն թշնամի ինձ մտերմացավ…
Եվ միայն անկարեկիցները հավատարիմ մնացին:
***
Իմիջիայլոց, հոգուն ևս օգտակար է դիետա պահելը:
***
Այն, ինչը չես պատկերացնում, հաճախ կարող ես պարզապես գնել:
***
Լինում են և ուխտադրուժ հավատացյալներ…
***
Ես ամբողջ կյանքում վախեցել եմ չլիցքավորած հրացաններից. դրանցով գլուխ են ջարդում:
***
Որքան չնչին են քաղաքացիները, այնքան լայնարձակ է թվում կայսրությունը:
***
Անկողմնակալները նույնպես անմասն չեն կողմնապահությունից. օրինակ` արդարության դեպքում:
***
Փոցխին մի՛ կանգնիր` տանը պետք կգա:
***
Լեզվի հետևը թաքնվելով` նա աշխարհին լեզու էր հանում:
***
Իրականության վրա կարող ես աչք փակել, բայց ոչ` հիշողությունների:
***
Ի՛նչ տարօրինակ է` դատարկ գլուխներում ամենադժվարը արձագանք առաջացնելն է:
***
Այդ մարդը համեստորեն իրեն գրամոլ էր կարծում, այնինչ` մատնիչ էր:
Թարգմանեց
Գևորգ ԹՈՒՄԱՆՅԱՆԸ
