Հունիսի 8-ին «Առնո Բաբաջանյան» համերգասրահում տեղի ունեցավ բանաստեղծուհի, արձակագիր, հրապարակախոս Ռուզան Ասատրյանի ծննդյան 70-ամյակին նվիրված հանդիսություն:
Աելիտա Դոլուխանյանը, Ռուզան Ասատրյանին նմանեցնելով «Սասնա ծռեր» էպոսի Ծովինարին՝ նրբագեղ ու արիասիրտ համարեց թե՛ նրան, թե՛ նրա պոեզիան: Գնահատելով նրան թե՛ որպես բանաստեղծի, թե՛ քաղաքացու՝ Ա. Դոլուխանյանը հիշեց «Զատիկ» մանկատուն կատարած իրենց այցելության մասին, որտեղ Ռ. Ասատրյանը պահանջում էր ըստ էության լուծել խնդիրները, հոգատարությամբ շրջապատել բախտի դաժան քմահաճույքով այդտեղ հայտնված երեխաներին: Ապա անդրադառնալով նրա գրական գործունեությանը՝ Ա. Դոլուխանյանը նկատեց, որ բազմաթիվ գրքերի հեղինակ Ռ. Ասատրյանը շարունակում է այն պոեզիան, որն սկսել են Հովհ. Շիրազը, Հ. Սահյանը՝ միաժամանակ լինելով ինքնատիպ բանաստեղծ: «Արցախյան շարժման օրերին ամենաուշադիր հայուհին է եղել, դա երևում է նրա բանաստեղծություններից: Այնքան շատ է սիրում հայրենիքը, որ երբեմն ընկնում է չափազանցությունների մեջ»,- ամփոփեց գրականագետը:
«Ռուզան Ասատրյանի օրերն ու տարին նրանից միշտ փախել են՝ նրան վերադառնալու համար£ Դրանք հեռանում են, երբեմն՝ մոտենում, բայց միշտ բաց են պահում հոգու դռները»,- նկատեց Սուրեն Դանիելյանը՝ վստահեցնելով, որ նրա պոեզիան օրերի մեջ իմաստնացել է: Հանգամանորեն վերլուծելով Ռ. Ասատրյանի գրական հունձքը՝ բանախոսն ամփոփեց. «Բանաստեղծական պատկերների տողանցքին միշտ փնտրտուքի մեջ անհանգիստ հայորդին չէր կարող ուշանալ՝ նայեք և կճանաչեք անմիջապես, անվրեպ կորսաք նրա խոսքի սլացքը՝ նա մա՛յրն է, կի՛նը, երկրի պաշտպանությանը զինվորագրված, մտքով սպառազեն և դեռ 5-րդ դարից չզորացրվող գրական կանանց գնդից՝ նոր սերնդի ավագանու նոր հերթափոխը»:
ՀԳՄ նախագահ Էդվարդ Միլիտոնյանը, ՀԳՄ բոլոր անդամների անունից շնորհավորելով Ռ. Ասատրյանին ծննդյան օրվա կապակցությամբ, ընդգծեց, որ անցած տասնամյակներում նա եղել է հանրապետության գրական կյանքի ակտիվ անդամներից և, որպես բանաստեղծ, հրապարակագիր, հասարակական գործիչ, իր նկատելի մասնակցությունն է բերել մեր ժողովրդի ազգային-հասարակական, գրական-մշակութային կյանքի զարգացմանը:
Արևշատ Ավագյանը, փաստելով, որ Ռ. Ասատրյանի հրապարակախոսության մեջ արծարծվում են մշակութային, ազգային, առողջապահական, տնտեսական, քաղաքական, բնապահպանական հիմնախնդիրները, նկատեց, որ հրապարակախոսի սրտացավությունը, նվիրումը, հայրենասիրությունը որևէ կասկածանք չեն առաջացնում:
Արագածոտնի փոխմարզպետ Նունե Մովսիսյանը Արագածոտնի մարզպետ Աշոտ Սիմոնյանի կողմից պատվոգիր հանձնեց Ռ. Ասատրյանին՝ ծննդյան 70-ամյա հոբելյանի և հասարակական-քաղաքական, մշակութային ոլորտներում ներդրած մեծ ավանդների համար:
Ռ. Ասատրյանի բանաստեղծական արվեստի, հրապարակախոսական գործունեության, նպատակամղված հայրենասիրության շուրջ ելույթ ունեցան նաև «Հայոց արծիվներ» հ/կ հիմնադիր նախագահ Խաչիկ Ասրյանը, Հայ Ավետարանչական եկեղեցու առաջնորդ Լևոն Բարդակչյանը և ուրիշներ:
«Վահագն» ռազմահայրենասիրական, բարեգործական հ/կ-ի հիմնադիր նախագահ Կարապետ Կարապետյանի անունից Աննա Կոստանյանը Ռ. Ասատրյանին պարգևատրեց «Դիցամայր Անահիտ» շքանշանով:
Շնորհակալական խոսքով ելույթ ունեցավ հոբելյարը՝ շեշտելով. «Իմ բոլոր ձեռքբերումները երեք գործոնների հետևանք են. առաջին՝ բնություն, որն իր ներդաշնակությամբ, իր անսպասելի փայլատակումներով ինձ սովորեցրել է ճանաչել մարդկային փիլիսոփայությունը, երկրորդ՝ ազգ, որի ճակատագիրը դրոշմվել է սրտիս և հոգուս ձեռագրերին, երրորդ՝ ժողովուրդ, որ ամեն աստծու օր ինձ սնում է իր իմաստնությամբ, որպեսզի քայլեմ արդարության ու լույսի ճանապարհով»:
Քայլել արդարության ու լույսի ճանապարհով
