ՀԳՄ 80-ԱՄՅԱԿԻՆ ՆՎԻՐՎԱԾ ՇՆՈՐՀԱՎՈՐԱՆՔՆԵՐ, ՈՒՂԵՐՁՆԵՐ

Հարգարժան պարոն Միլիտոնյան,
Հայաստանի գրողների միության անդամներ՝
արձակագիրներ, բանաստեղծներ և մտավորականներ

Լավագույն ողջույններով ու ցանկություններով ի սրտե շնորհավորում եմ Հայաստանի գրողների միության հիմնադրման տարեդարձը:
80 տարի առաջ արվեստասեր Հայաստան երկրի մի խումբ մտավորականների ու գրականության մշակների ձեռամբ մի շիվ տնկվեց, որն այսօր վերածվել է վիթխարի, բերքառատ ծառի, որի քաղցրահամ պտուղները ոչ միայն հայ ժողովրդի քիմքն են քաղցրացնում, այլև մտքի ու գաղափարի աշխարհի ողջ բնակիչների: Սիրելի՛ գործակիցներ, Իսլամական Իրանի մշակույթ ու գրականություն սիրող ժողովրդի անունից շնորհավորում եմ այս երջանիկ առիթով:
Հուսով եմ, որ երկար տարիներ կշարունակվի և կընդլայնվի Հայաստանում Իրանի Իսլամական Հանրապետության դեսպանության մշակույթի կենտրոնի և Հայաստանի գրողների միության արդյունավետ համագործակցությունը:

Հարգանքներով՝ Մաջիդ ՄԵՇՔԻ
ՀՀ-ում Իրանի Իսլամական Հանրապետության
դեսպանատան մշակույթի խորհրդական

Ոգու Արարատ
Հայաստանն իմ հիշողության և գիտակցության մեջ մնացել է երկու հիմնական իրողությամբ. քարերով ու փառահեղ Արարատով… Քարն ամենուր է. սկսած հին քարե եկեղեցիներից ու ժայռափոր վանքերից, որոնց պատերին հայերեն գրեր են փորագրված, առանձնահատուկ և պատկերազարդ քարեղեն խաչեր-խաչքարեր մինչև ժամանակակից քարե շենքեր Երևանի կենտրոնում… Ու քանի որ քարը հավերժության հնագույն խորհրդանշանն է, ինձ համար Հայաստանը նույնպես հավերժության խորհրդանշան է, որի ոգեղեն պատերի մեջ փորագրված են Սբ. Մաշտոցի անմահ տառերը և հայոց բազմադարյա գրականության ավանդույթները… Իսկ հայ գրողները՝ ոգեղեն քարեր, որոնցով վեր է հառնում հայկական ոգու և ինքնության տաճարը… Նարեկացին, Թումանյանը, Չարենցը, Սևակը, Շիրազը… Այս և այլ «քարերի» վրա են այժմ շարունակվում այդ դարավոր ոգու տան պատերը շարվել…
Հայաստանի գրողների միությունը 80 տարեկան է: Դա իրապես իմաստուն, արժանահիշատակ ու առաջադիմական տարիք է: Բավական իմաստուն, որպեսզի շարունակի իր ժողովրդի հոգևոր տան կերտումը և վարի ազգային գրականության Նոյյան տապանը, որ փրկում ու պահպանում է անանց բառը ջրհեղեղից՝ այն միշտ դեպի բարձունք ուղղորդելով, դեպի Ոգու Արարատ…
Շնորհավորում եմ ձեզ հոբելյանի առթիվ, թանկագի՛ն հայ բարեկամներ ու գործընկերներ:

Ռոման ԿԻՍՅՈՎ
Բուլղարիա

Հայաստանի գրողների միությունը 80 տարեկան է: Սրտագին շնորհավորանքներ: Այդ ճանապարհի մի փոքր մասը մենք միասին ենք անցել: 2010 թ. սեպտեմբերին Լևոն Անանյանը Հայաստանի գրողների միության կողմից, ես՝ Սաքսոնիա-Անհալթի «Ֆրիդրիխ Բյոդեքեր» միության, կնքեցինք պայմանագիր՝ երկու երկրների միջև գրական համագործակցության մասին: Այդ ժամանակվանից շատ աշխատանք է կատարվել:
2014 թ., երբ Երևանը ՅՈՒՆԵՍԿՕ-ի կողմից գրքի համաշխարհային մայրաքաղաք էր հայտարարված, մենք համատեղ տպագրեցինք երկու գիրք. «Վերջապես անցան սառը օրերը. Սաքսոնանհալթյան պոեզիա, գերմաներեն-հայերեն» և «Արդի հայ պոեզիա. գերմաներեն» գրքերը: Երկու գրքերն էլ եղել են և կան որպես հիմնաքարեր մեր բարեկամության ու ընթացիկ գրականության փոխըմբռնման ճանապարհին՝ ինչպես Սաքսոնիա-Անհալթում, նույնպես և Հայաստանում: Եվ զարմանալի չէ, որ գրքերի շնորհանդեսը տեղի ունեցավ միասին՝ Երևանում:
Սաքսոնիա-Անհալթից գրողներ են մասնակցել Հայաստանում տեղի ունեցած Պոեզիայի փառատոնին և այլ առիթների, Հայաստանից գրողներ են մասնակցել աշնանը տեղի ունեցող մեր ամենամյա Միջազգային գրական ընթերցմանը: Սաքսոնիա-Անհալթի ՕDA ամսագրում շարունակաբար տպագրվում են հայ գրողների ստեղծագործություններ, մեր հեղինակների ստեղծագործությունները տպագրվում են հայկական «Արտասահմանյան գրականություն» ամսագրում: Այս ամենը իրականացվել է մեր պայմանագրի ստորագրումից 3 տարի անց, որը շատ լավ է:
Հայոց եղեռնի 100-ամյակին նույնպես մենք պատրաստվում ենք ճանապարհը միասին անցնել: Երկու երկրներում 2013/14 ուսումնական տարում հայտարարվել է շարադրությունների մրցույթ «Այլևս երբեք ցեղա­սպանություն» թեմայով: Շուտով՝ հուլիսի 20-ին, մենք կկարողանանք գնահատել արվածը և այդ թեմայի քննարկման համար երեխաների ձայնը լսել:
Ավելին, մենք պատրաստվում ենք համատեղ հրատարակել Ցեղասպանության զոհ դարձած գրողների ստեղծագործությունների ժողովածու: Այն շատ կարևոր է, քանի որ երբևէ այդ հեղինակների ստեղծագործությունները չեն թարգմանվել գերմաներեն, և կարող է Գերմանիայի ուշադրությունը սևեռել Եղեռնի վրա: Դպրոցականների տեքստերի և Ցեղասպանության զոհ գրողների անթոլոգիաների շնորհանդեսը կլինի 2015թ. մայիսին Սաքսոնիա-Անհալթի մայրաքաղաք Մագդեբուրգում, գերմանական ՊԵՆ կենտրոնում:
Մեր նպատակների իրագործման համար մեծ աշխատանք, փոխըմբռնման կամք և վստահություն է անհրաժեշտ: Ես հուսով եմ, որ շարունակելու ենք ընթանալ մեր 2010 թ. ընտրած ճանապարհով և, այդ առիթով, սիրելի՛ հայ գործընկերներ, մեկնում եմ իմ ձեռքը:

Յուրգեն ՅԱՆԿՈՎՍԿԻ
Գերմանիայի Սաքսոնիա-Անհալթ երկրամասի «Ֆրիդրիխ Բյոդեքեր» միության նախագահ

Ուղարկում եմ իմ ջերմագին ողջույնները Քինգսթոնից՝ Հայաստանի գրողների միության իմ արժանավոր գործընկերներին և սիրելի ընկերներին, ովքեր տոնում են գրական կազմակերպության 80-ամյակը: Որպես գրող հայկական Սփյուռքում, ով պարբերաբար այցելում է Երևան, ես շատ եմ կարևորում մեր համատեղ աշխատանքը և մեզ ընձեռված շարունակական հնարավորությունները՝ համաժողովներում փոխանակելու մեր փորձը և իրականացնելու համատեղ ծրագրեր: Տարիների ընթացքում շատ բան եմ սովորել ձեզանից և շնորհակալ եմ ձեր ջերմ ու առատաձեռն հյուրընկալության համար: Լավ հիշողություններ ունեմ Ծաղկաձորի և մեր վաղեմի ընկեր Լևոն Անանյանի մասին: Սպասում եմ՝ շարունակելու մեր երկխոսությունը, մասնավորապես՝ Հայոց եղեռնի 100-ամյակի առիթով:

Լավագույն ցանկություններով՝
Ալան ՈՒԱՅԴՀՈՐՆ
Կանադա

ՀԳՄ մեծարգո նախագահ Էդ. Միլիտոնյան,
ՀԳՄ հարգելի անդամներ

Մեծ ուրախությամբ ողջունում եմ բոլորիդ և շնորհավորում Հայաստանի գրողների միության հիմնադրման 80-ամյակի առթիվ: Ակնհայտ է, որ ինչպես խորհրդային, այնպես էլ հետխորհրդային տարիներին ՀԳՄ-ն եղել է հայկական գրական աշխարհը միավորող ուժը: Այո՛, հայկական և ոչ թե միայն Հայաստանի, որովհետև սփյուռքահայ գրողներս նույնպես միշտ զգացել ենք ՀԳՄ-ի հոգատար վերաբերմունքն ու ուշադրությունը մեր նկատմամբ: Հատկանշական է, որ իր ողջ գործունեության ընթացքում ՀԳՄ-ն միշտ բարձր է պահել հայ գրողի դերը և՛ Հայաստանի ներսում, և՛ սփյուռքահայերի շրջանում:
Մեծ կարոտով եմ հիշում երջանկահիշատակ Լևոն Անանյանի հետ ունեցած բարեկամությունս և, իհարկե, բոլոր այցերս Հայաստան՝ ՀԳՄ միջոցառումներին մասնակցելու: Շատ եմ ցանկանում, որ պահպանենք և ավելի զարգացնենք Ռումինահայոց միության և ռումինահայ գրողների հարաբերությունները ՀԳՄ-ի հետ, որոնք արդեն երկար տարիներ շարունակվում են:
Եվս մեկ անգամ ուզում եմ իմ ողջույնի խոսքը հղել ՀԳՄ նախագահ Է. Միլիտոնյանին և բոլոր անդամներին՝ հուսալով, որ ՀԳՄ-ն միշտ իր ուրույն տեղը կունենա հայ հասարակության շրջանում:

Վարուժան ՈՍԿԱՆՅԱՆ
Ռումինահայոց միության նախագահ,
սենատոր

Սիրելինե՛ր,
Հոգեկան անհուն հրճուանքով եւ արտակարգ խանդավառութեամբ կը միանանք Ձեզի՝ միասնաբար տօնելու Հայաստանի Գրողներու Միութեան հիմնադրութեան 80-ամեակը, որ, մեր խոր համոզումով, սովորական թուական մը պիտի չըլլայ Մաշտոցեան բանակի ուխտեալ զինուոր մէն մի հայ գրողի համար, ո՜ւր ալ շնչէ եւ շնչաւորէ ան՝ ի Հայաստան, ի Սփիւռս կամ Արցախ հայաշխարհի տարածքին: 80 տարի առաջ, հայ գիր ու մշակոյթի անմահանուն նահապետներուն՝ Ա. Շիրվանզադէի, Ե. Չարենցի, Ա. Բակունցի, Վ. Նորենցի, Վ. Ալազանի եւ այլ գրողներու աներեր հաւատքով, անմնացորդ նուիրումով եւ տքնաջան աշխատանքով հայ կեանքը լուսաւորելու կոչուած Հ.Գ.Միութիւնը հայոց նորագոյն պատմութեան պայծառագոյն նուաճումներէն մէկը հանդիսացաւ: 80 երկար տարիներ այսօր մեզ կը բաժնեն այդ պատմական թուականէն, եւ ութ տասնամեակներու նուաճումներով ու յաղթանակներով հարուստ գոյերթը մի՜միայն հպարտութիւն կրնայ ներշնչել բոլորիս եւ մեզ հրաւիրել՝ յաւելեալ վճռականութեամբ, ծառայական ամբողջական նուիրումով եւ նոյնքան վերանորոգ Մեսրոպաւանդ յանձնառութեամբ շարունակելու մեր դժուարին, բայց անհունօրէն սիրելի ու նուիրական ճանապարհը: Պիտի սիրէինք ըսել՝ պատմակերտ յաղթերթը, որովհետեւ, նոյնիսկ իր հիմնադրութեան յաջորդած տագնապալի ծանր տարիներուն, Հ.Գ.Մ.-ը յաջողեցաւ յաղթական դուրս գալ իր ազգային առաքելութեան սպառնացող ամէն տեսակի մարտահրաւէրներէն ու փորձութիւններէն, պայքարեցաւ մինչեւ շո՜ւնչ վերջին եւ ինքզինք հաստատեց՝ իբրեւ դարաւոր հայ ոգիի, ազգային ինքնութեան եւ համամարդկային մշակոյթի հարստացման ու ա՜լ աւելի ազնուացման ի խնդիր տիւ ու գիշեր ճառագայթող լուսաբաշխ փարոս: Այս ուխտին, ուխտը ոգեշնչող ու կենարար գործի վերածող այս անսակարկ նուիրումին մենք ականատես եւ մասնակից եղանք մանաւանդ Հայաստանի Հանրապետութեան վերանկախացումէն ետք, երբ ո՜չ միայն սփիւռքահայ գրողները, այլեւ «տարագիր, բայց ոչ օտար» մեր գրչեղբայրները նաեւ «Մէկ ազգ, Մէկ մշակոյթ» կարգախօսին ներքեւ համա­խմբելով՝ Հ.Գ.Մ.-ը գործնապէս եղաւ բառին բովանդակ եւ ազնուագոյն առումով համազգային փառապանծ միութիւն, պարզ ըսած՝ բոլո՜ր հայ գրողներուն միութիւնը: Տակաւին պիտի ուզէինք ընդգծել՝ եղաւ ճշմարտութեան յուշարարը, գեղեցիկին պատարագիչը, բարիին ու վսեմին քարոզիչը, հայ ժողովուրդի անժամանցելի արդար իրաւունքներուն պաշտպանն ու պահանջատէրը, մէկ խօսքով՝ տարօրէն ազգային եւ էապէս համամարդկային հայ ոգեղէն արժէքներուն, հայկական ինքնութեան եւ հայ ժողովուրդի ապագայատեսիլ դարաւոր ուխտին աւանդապահն ու անսխալ կողմնացոյցը: Տգեղին դէմ՝ գեղեցի՜կը պաշտպանող, չարին դիմաց՝ բարի՜ն տարածող, նիւթին փոխարէն՝ ոգի՜ն փառաբանող, կեղեքումին փոխան՝ արդարութի՜ւնը օրհներգող եւ գնայունին տեղ՝ մի՜միայն ազգային ու համամարդկային մնայուն արժէքներն ու աւանդները ամէն բանէ գերիվեր հռչակած Հ.Գ.Մ.-ը ջլապինդ, երիտասարդ եւ վճռակամ ութսունամեայ նոյն աւանդապահն է այսօր: Եւ ինչպէս երէկ, այսօր եւ վաղը նաեւ հայ ժողովուրդի կեանքին մէջ ունի եւ պիտի շարունակէ իր վճռադրոշմ ու պատմակերտ առաքելութիւնը՝ ի հզօրացում Հայաստանի Հանրապետութեան, ի ծառայութիւն հայ մշակոյթին եւ ի երջանկացում մշակութապաշտ հայ ժողովուրդին:
Բարին ընդ ձեզ եւ ընդ մեզ:

ՔԱՐՏՈՒՂԱՐՈՒԹԻՒՆ՝
ԼԻԲԱՆԱՆԱՀԱՅ ԳՐՈՂՆԵՐՈՒ
ՀԱՄԱԽՄԲՈՒՄԻ