Նոր տարի է, Նոր տարի,
Ո՞վ է տեսել՝ այլ տոնի
Մարդիկ լինեն հավատով,
Այսքան ներող ու բարի:
Վաղ արթնանանք
ու արագ
Տունը, բակը հարդարենք,
Խինդով, երգով
մեր սիրած
Տոնածառը զարդարենք:
Ո՞վ է տեսել՝ այլ տոնի
Այսքան լույսեր ու գույներ,
Հեռու-մոտիկ, հարազատ
Հանդիպումներ սրտալի:
Ո՞վ է տեսել՝ այլ տոնի
Սեղանները բոլորի
Ուտեստներով, մրգերով
Լինեն այսքան հյութալի:
Ձյունանուշ ու Ձմեռ Պապ,
Այնքան ջերմ եք ու բարի,
Եկեք, մեզ հետ մնացեք
Մինչև գալիք Նոր տարի…
