Ու կասկածում ես արդեն՝
ով է բանականը, ով է իրականը ձեզնից…
***
Ճյուղից կախ
բացիկ-խոստովանություն
համակագչի էկրանին՝
լույս-ստվերի խաղով
(հենց նոր գեներացրիր):
Լույսերը հանես՝ բան չի մնա:
Այսպես՝ «սեր» է ճառագում,
թեկուզ արհեստական,
աչք է շոյում, սիրտ է ջերմացնում,
նույնիսկ հարցնում է
նրբանկատորեն.
մնա՞մ մի քիչ էլ հետդ:
***
Չտխրես.
քեզ կհիշեն ինչպես բոլորին՝
պահերին հարմար։
Չտխրես,
քեզ կմոռանան
հաջորդ օրն արդեն`
գործերով տարված։
Կտեսնեն երազում կրկնվող,
կկանչեն անձայն՝
լուսաբացին մոտ
կիրակի օրվա,
մինչև մի օր:
Մինչև մի օր կիրակին
ուրիշ երազ կբերի։
Չտխրես։
ԲԱՌԱԽԱՂ
«Սիրել,
ապրել,
կարոտել,
շուն.
շարքից
ընտրեք ավելորդ բառը»՝
հանձնարարված է տեքստում։
Իսկ եթե ոչ մեկն ավելորդ չէ,
իսկ եթե «ընտրեք»-ը ծուղակ է ընդամենը,
և բառերը՝ թաքստոց։
***
«Ննջել»-ը ուրի՜շ,
բոլորովին այլ
իմաստ է ստանում,
երբ հայտնվում է
«հավերժ»- ի կողքին`
նույն տողում։
***
Պահեք
շուն,
կատու,
նապաստակ,
թե ուզում եք:
Եվ մի դժգոհեք,
թե չեն խոսում…
Եվ մի ստիպեք,
որ ժպտան
նկարից ընտանեկան,
էկրանից հեռախոսի,
երբ նորից անձրևում է,
իսկ դուռը փակ է դրսից:
Պահեք
շուն,
կատու,
թութակ,
թե ուզում եք:
Բայց այցելեք սրտաբանի,
ստուգեք
սիրտը պարբերաբար
(Ձերն ու նրանը),
որ չփնտրեք հետո
սենյակում դատարկ,
չշրջվեք անհամբեր,
երբ լսեք հանկարծ
շան կամ
կատվի
անունները
մարդացած:
***
Ի՞նչ կարևոր են արկղի չափերը,
թե սիրտ է միջինը։
***
Տաք ու մեղմ քամի է,
Տաք ու մեղմ գարուն է…
Ճերմակը ծաղկաթերթ է՝
Ճերմակած մազերին:
***
Այսօր նորից հագար սև զգեստը.
այն, որ հագնում ես տխուր առիթներին,
որ ընդգծում է գունատությունը դեմքիդ՝
արցունքներից հետո:
Այսօր նորից խղճացիր քեզ
ու նյարդայնացար.
էլի գնացին, ու էլի դո´ւ մնացիր
լացող իրենց համար:
Անխիղճնե(՞)ր: Էգոիստնե(՞)ր…
Բայց շորդ սազում է, ի՜նչ խոսք:
***
Ափդ բա´ց
(ինչպես այն ֆիլմում),
պարզի´ր առաջ,
որ սիրտդ անցնի պատի միջով:
Ետ չնայե´ս…
Շնչել չմոռանա´ս:
