ԱԶԳԱՅԻՆ ԱԿՈՒՆՔՆԵՐՈՒՄ
ԱՐՄԵՆՈՒՀԻ ԴԵՄԻՐՃՅԱՆ. «ՀԱՅԿ ՆԱՀԱՊԵՏ»
2023 թ. մայիսի 16-ին Սիլվա Կապուտիկյանի հյուրընկալ հարկի ներքո Խ. Աբովյանի անվան հայկական պետական մանկավարժական համալսարանի հայ հին և միջնադարյան գրականության և նրա դասավանդման մեթոդիկայի ամբիոնի նախաձեռնությամբ տեղի ունեցավ Սիլվա Կապուտիկյանի տուն-թանգարանի տնօրեն Արմենուհի Դեմիրճյանի «Հայկ Նահապետ» գրքի շնորհանդեսը, որը մեկտեղեց տարիքային և մասնագիտական տարբեր խմբերի պատկանող մասնագետների, ուսանողների և հյուրերի:
Միջոցառմանը նախորդեց Սիլվա Կապուտիկյանի տուն-թանգարան կատարած շրջայցը, որի ընթացքում շնորհանդեսի մասնակիցները ծանոթացան բանաստեղծուհու կյանքի կարևոր իրադարձություններին, զգացին նրա շունչը, ընկղմվեցին գրական հարուստ ժառանգության մեջ:
Շնորհանդեսը մեկնարկեց ՀՊՄՀ բանասիրական ֆակուլտետի դեկան, պրոֆեսոր Աշոտ Գալստյանի բացման խոսքով: Վերջինս կարևորեց այն փաստը, որ միջոցառումը կազմակերպվում է հենց Սիլվա Կապուտիկյանի տուն-թանգարանում, մի անհատի, որի մանկական բանաստեղծություններին հայ մանուկները ծանոթանում են դեռևս տարրական դասարաններում, իսկ 5-րդ դասարանում առաջին դասը սկսվում է «Խոսք իմ որդուն» բանաստեղծությամբ:
Գրքի հայրենասիրական և մարդասիրական գաղափարները կարևորեց ՀՊՄՀ բանասիրական ֆակուլտետի հայ հին և միջնադարյան գրականության և նրա դասավանդման մեթոդիկայի ամբիոնի վարիչ, բան. գիտ. դոկտոր, պրոֆեսոր, ՀՀ ԳԱԱ թղթակից անդամ Աելիտա Դոլուխանյանը՝ «Հայկ Նահապետ» գրքի պատմական, մանկավարժական, գեղարվեստական արժեքը» բանախոսությամբ: Նրա կարծիքով Սիլվա Կապուտիկյանը Հայկ Նահապետի անմիջական հետնորդներից մեկն է, ինչը բանաստեղծուհին ապացուցել է իր կենսակերպով, գաղափարներով և հասարակական գործունեությամբ: Բանախոսության ընթացքում Ա. Դոլուխանյանը մանրամասն ներկայացրեց գրքի պատմական արժեքը: Հայկ Նահապետը և նրա ապրած ժամանակաշրջանը ուսումնասիրության թեմա է եղել բազմաթիվ հետազոտողների համար, սակայն բանախոսի կարծիքով առավել կարևոր են օտարների կողմից տրված գնահատականները, որոնք փաստում են, որ համայն աշխարհի համար հայ ժողովուրդը եղել է և մնում է որպես աշխարհի հնագույն ազգերից մեկը, ով ապրել է իր բնօրրանում, ստեղծագործել է հազարամյակներ շարունակ, պայքարել ազատության համար և հասել մինչև ներկա օրերը:
Բանախոսությանը հաջորդեցին բանասիրական ֆակուլտետի մագիստրատուրայի առաջին կուրսի ուսանողուհի Աննա Կոստանյանի և բակալավրիատի չորրորդ կուրսի ուսանողուհի Մերի Առաքելյանի ելույթները՝ համեմված գրքից արված մեջբերումներով:
Շնորհանդեսի վերջում ներկաներին իր շնորհակալական խոսքն ուղղեց Արմենուհի Դեմիրճյանը՝ միևնույն ժամանակ ներկայացնելով գիրքը գրելու պատճառները, նպատակը, պատկերացումները և մտահոգությունները:
Շնորհանդեսն անցավ ջերմ մթնոլորտում և հաստատեց այն կարևոր իրողությունը, որ Հայկ Նահապետի գաղափարներն ամրակայվել են նրա սերունդների մեջ և հասել մեր օրեր:
Մայա ԳՐԻԳՈՐՅԱՆ
Բան. գիտ. թեկնածու
ՀՀ ԳԱԱ Հիմնարար գիտական գրադարանի տնօրեն
