ՀՐԱՆՏ ՄԱԹԵՎՈՍՅԱՆ
Եթե մենք առհասարակ կարողանում ենք իշխել մեր կրքերի, մոլությունների վրա, ապա Վահագն Դավթյանը մարդու, գործչի և պոետի իր կյանքը վարում էր ճարտարապետներին քաջածանոթ ոսկե հատման օրենքով։
Նրա մեջ ոսկե հատման օրենքից էին ելնում կամ օրենքին էին հանգում հարաբերությունները մարդկանց հետ և երևույթների հետ։
Ոչ մի գիտակ ու գիտնական չի կարող վկայել գիտնականի նրա թուլությունը, ոչ մի բանաստեղծ չի կարող վկայել՝ թե նրա տարերքը պակաս կատաղի էր, ոչ մի խմբագիր չի կարող ասել՝ թե ինքը երբևէ ավելի համարձակ թերթ ու հանդես է հրապարակել, ոչ ոք չի կարող հպարտանալ՝ թե անձնական կամ ազգային ցավի առաջ ինքը ավելի զգայուն է եղել, և հակառակը՝ բոլորը-բոլորս միաբան ենք, որ մեր ամենագիտնականից գիտնական, ամենահամարձակից համարձակ, ամենահորդից հորդ՝ նա երբեք, ոչ մի տեղ, ոչ մի անգամ չավիրեց իր ոչ աջ, ոչ էլ ձախ ափը։
Խաղաղ ուժի մշտակա ներկայությունը նրան թույլ չտվեց ապստամբ ու խռովարար լինել։ Այլև՝ իր մեծ ավագների, հիանալի իր ցեղի, ցեղի իր պատկերացման հովանու ներքո՝ գուրգուրեց և պաշտեց այն ամենը, ինչը այս ժողովրդի հանրապետությանը բերում էր այս ազգի պատմական առաքելությանը ներդաշնակ տեսքի – կլիներ դա անանուն մեկի երկու հաջողված տողը, պատանիների հայ սերնդի բարձրացող հասակը, կամարների կորերը, երգչուհու դիսկոները, թե որևէ պաշտոնյայի շիտակությունը։
Նա և իր սերունդը դատապարտված էին հոգևոր ամլության, նրանք պիտի որ իրենց ետևից հոգևոր անապատ թողնեին, որովհետև այդպես էր կարգված ի վերուստ, որովհետև մտքի և զորքի տիրանները իրենց գրքում ի սկզբանե նրանց վերապահել էին լուսանցքային ներկայություն միայն, Չարենցի խոսքով՝ նրանք պետք է ասեղնագործեին երկնքի խավարը.
– Ինչպես հանճարեղ մի աղջիկ
Երկնքի խավարն ասեղնագործեր։
Բայց նրանք՝ այդ Չարենցը, այդ Պարույրը, այդ Համոն, Վահագնը, Սիլվան, այդ Շիրազը և ողջ սերունդը, հիմնեցին ու ծաղկեցրին հենց հոգևոր այգեստան։
Նրանց կոչել էին, ինչպես մեր հին ծաղկագրողներին, զարդարելու հիմնական տեքստը, իսկ նրանք ահա բովանդակություն դարձրին հենց լուսանցքը, անդեմ-անգույն Հայաստան հայրենիքը, անանուն-անդեմ մարդը, պատսպարվեցին հենց լուսանցքում, և անցած յոթանասունամյակի մեծ գիրքը այսօր մեծարժեք է հենց լուսանցքի շնորհիվ։
Եվ փառք իրեն ու իր սերնդին։
Իր զուսպ, զորեղ, սթափ ներկայությամբ՝ ոչ մեկի, ոչ մեկիս բերանը մի անգամ չշարժվեց մեծարման խոսքով պսակավորելու իրեն, և միայն հիմա, իր լռությունից օգտվելով, ասենք.
Ինչ մեծ, ինչ սև խոռոչ է իր լքած տեղը – բանաստեղծի տեղը և գործչի տեղը, ապաստարանը մշակութային ողջ ժառանգության և ապաստարանը կենդանի բոլոր թրթիռների։
ՀԱՄՈ ՍԱՀՅԱՆ
ԱՄԲՈՂՋԱԿԱՆ ՄԻ ԱՇԽԱՐՀ
Վահագն Դավթյանի ստեղծագործությունն ամբողջացած մի աշխարհ է, ամբողջական մի շենք: Եվ այդ շենքը նման է միջնադարյան վանքի. հիմքերը՝ որձաքարե ժայռերի մեջ, գմբեթը՝ երկնքում: Եվ այդ այնքան է ներդաշնակ իր շրջապատին, այնպես է ձուլված ու խառնված բնությանն ու բնականին, որ շատ հեռուներից չի երևում: Տեսնելու, նրան հասնելու համար պետք է հավատավոր լինել ու արվեստի ուխտավոր, որպեսզի հաղթահարես ճանապարհի դժվարությունը: Իսկ վանքի ճանապարհը միշտ էլ դժվար է եղել: Երևի նրա համար, որ ուխտավորը մարզի մարմինը, հոգնի ու տաճարի վեհության առաջ հանգստանա միանգամից ու վեհանա… Թե ինչ նոր օժանդակ շենքեր է կառուցելու Վահագն Դավթյանն իր տաճարի շուրջը, մեզ հայտնի չէ, թերևս չգիտե նաև ինքը: Կարևորն այն է, որ նրա կառուցածը տաճար է՝ երկար, շատ երկար ժամանակների և շատ սերունդների համար:
Թող Աստված չանի, իսկ Աստծո աչքը, թվում է, կշտացել է մեր գլխին աղետներ բերելուց, և չի անի, եթե հանկարծ աղետ պատահեր և աշխարհի երեսից վերանար հայ բազմադարյան պոեզիան և հրաշքով փրկվեր միայն Վահագն Դավթյանի վերջին ծաղկաքաղ մատյանը, այդ մատյանը կարդալով՝ մարդիկ կպատկերացնեին, թե ազգային ինչպիսի մեծ ու ազնիվ պոեզիայի արդյունք է դա, թե բանաստեղծության ինչ լեզու և լեզվի ինչ բանաստեղծություն է ունեցել հայ ժողովուրդը: Կպատկերացնեին, ինչպես մենք ենք պատկերացնում նախաքրիստոնեական ժամանակների մեր պոեզիայի վեհությունը մեզ հասած պատառիկների շնորհիվ: Կպատկերացներին, որովհետև այդ մատյանն իր մեջ առած ունի հայ պոեզիայի բոլոր լավագույն հատկությունները՝ «Վահագնի ծնունդից» մինչև «Հոգեհանգիստ», մինչև «Ափ մը մոխիր», մինչև «Նաիրյան շարքը» (տերյանական), մինչև «Ես իմ անուշ Հայաստանի», մինչև «Արա Գեղեցիկ» ու «Ձայն հայրենական»: Այս բոլորը, երևի, այսքան նշանակալից չլիներ, չդառնար այդքան մեծ արժեք, եթե չկրեր Դավթյանի անխառն անհատականության կնիքը: Անհատականություն, որի անստորագիր կես տողի ելևէջն անգամ անմիջապես մատնում է հեղինակին: Իսկ ինչպիսի՞ բանաստեղծ է Վահագն Դավթյանը այդ մատյանով… «Հանդա՞րտ», «մեծադղո՞րդ», «ինտելեկտուա՞լ», «զգացմունքայի՞ն», «կրքայի՞ն», թե՞ «կյանքային»: Ես կասեի՝ բոլորը միասին, ամբողջական, միակտոր, միաձույլ, կատարյալ, անթերի:
Երջանիկ է Վահագն Դավթյանը. սերնդակից-գրչակիցները միշտ էլ բարի նախանձով են նայել ջուլհակ նախնիներից ժառանգած նրա աշխատասիրությանը, ազնիվ մտավորականի պահվածքին, գրական բարձր ճաշակին և քառատողերի անմրցակից ճարտարությանը…
Երկու տասնամյակ առաջ լրագրողի այն հարցին, թե ժամանակակից ո՞ր հայ բանաստեղծին եմ սիրում, պատասխանել էի. «Մեկին սիրելը լավ է միայն ընտանիք կազմելու և պահպանելու համար, իսկ գրականության մեջ պարտադիր չէ»: Նշել էի տասը բանաստեղծի անուն, որոնց սիրում էի և սիրում եմ ամեն մեկին մեկ կամ մի քանի առավելությունների համար: «Սիրում եմ այդ բոլորին,- ասել էի,- բայց խանդում եմ միայն Վահագն Դավթյանին, որովհետև նա, ասելիքից բացի, ունի նաև պատմելիք և ունի սեփական անհանգիստ միտքն անընդհատ կարգավորող խելք, որ ուրիշ խոսքով մեծ տաղանդ է նշանակում»:
Այսօր էլ եթե ինձ տրվեր այդ հարցը, նույն պատասխանը կտայի, միայն մեր մյուս բանաստեղծներին չնեղացնելու համար կավելացնեի գուսանի նախնական ու սրտալի տողը. «Սիրուննե՛ր, մի՛ք նեղանա, որ ես իմ յարին եմ գովում»:
Մի հանդիպման ժամանակ Վահագն Դավթյանին հարցրին՝ ո՞րն է Ձեր ամենալավ բանաստեղծությունը՝ Ձեր կարծիքով: Դավթյանը պատասխանեց՝ տակավին չի գրվել այդ բանաստեղծությունը, որ այդ բանաստեղծությունը պետք է լինի զարմանալի պարզ ու տաք մի երգ: Երգ, որն անբառ է իբրև թախծություն, իբրև հառաչ, որ անհուն է, անմեկնելի է ու անեզրական…
Եվ սա ասում է այն բանաստեղծը, որ հայ պոեզիային տվել է այնպիսի գլուխգործոցներ, ինչպիսիք են «Թոնդրակեցիներ», «Բայց ծնվեցի», «Ասք սիրո և սրի», «Ռեքվիեմ» պոեմները, տաղերի շարքը և բազմաթիվ այլ բանաստեղծություններ…
Ի՞նչ է սա՝ պչրականությո՞ւն, թե՞ անվստահություն իր ստեղծածի նկատմամբ: Ո՛չ մեկը, ո՛չ մյուսը: Եվ ո՛չ էլ այն, որ իր պոեզիայի այդքան ներդաշնակ ու ամբողջական տաճարներից չի կարող առանձնացնել մի քար, մի քանդակ և ասել՝ սա՛ է ամենից լավը… Շենքի ներդաշնակությունը խախտելու վախ նա չունի: Պարզապես ճշմարիտ արվեստագետի համար իր ամեն մի ձեռքբերումը, նվաճումը, հաղթանակը ոչ թե արտոնություն է բերում, այլ նոր պատասխանատվություն, մի նոր պարտք, և վճարած ամեն մի պարտքը դառնում է հրամայական՝ նոր պարտքերի… Եվ այսպես շարունակ: Այսպես է: Բայց ես կուզենայի, իբրև Դավթյանի պոեզիայի հավատավոր ընթերցող, իրավունք վերապահել ինձ և ասել, որ Վահագնը ինձ համար արդեն գրել է այդ զարմանալի պարզ ու տաք երգը, երգ, որ անբառ է իբրև թախծություն և իբրև հառաչ…