Ապրիլի 13-ին տեղի ունեցավ ՀԳՄ նախագահության նիստ, որի ընթացքում ՀԳՄ նախագահ Էդվարդ Միլիտոնյանը ներկայացրեց եռամսյա հաշվետվություն, ապա անդրադարձավ հաջորդ երեք ամիսների համար նախատեսված աշխատանքներին: Նա նշեց, որ հունվարի 26-ի ՀԳՄ նախագահության նիստից հետո համապետական առաջին միջոցառումը նվիրված էր Գիրք նվիրելու օրվան գրողների ու թիվ 133 դպրոցի աշակերտների մասնակցությամբ ՀԳՄ Պոեզիայի պուրակում, փետրվարի 19-ին: Եվս 20 գրող հանդիպում ունեցավ Երևանի մի շարք դպրոցներում: Փետրվարի 21-ին տեղի ունեցավ ՀԳՄ ամենամյա մրցանակների հանձնման արարողությունը:
Չարենցի 125-ամյակին նվիրված մամլո ասուլիսներ եղան ԿԳՄՍ նախարարությունում և բանաստեղծի տուն-թանգարանում: Մարտի 13-ին Չարենցի հուշակոթողի մոտ տեղի ունեցավ գրական ցերեկույթ, ինչպես նաև ցուցահանդեսի բացում գրողի տուն-թանգարանում: ՀԳՄ նախագահը տեղեկացրեց, որ ներկայացրել են տարվա ընթացքում իրականացվող միջոցառումների ծրագիր և պատրաստում են Չարենցին նվիրված ժողովածու:
Փետրվարի 21-ին ՀԳՄ ճեմասրահում ՀԳՄ-ի և Կենտրոն վարչական շրջանի հետ համատեղ տեղի ունեցավ ավանադաբար նշվող Պոեզիայի միջազգային օրվան նվիրված ցերեկույթ: Մայիսին Ծաղկաձորի գրողների հանգստյան տանը նախատեսվում է կազմակերպել միջոցառում՝ նվիրված Եղիշե Չարենցին:
Մարտի 25-ին ՀԳՄ նախագահը մասնակցել է Չարենցի անվան գրականության և արվեստի թանգարանում կազմակերպված, Դերենիկ Դեմիրճյանի 145-ամյակին նվիրված միջոցառմանը, իսկ մարտի 30-ին Քաղաքային պանթեոնում տեղի ունեցավ գրական միջոցառում, որի ընթացքում կատարվեց ականավոր գրողի բարելիեֆի հանդիսավոր բացման արարողությունը։ Ի դեպ, ՀԳՄ-ն բարելիեֆի ստեղծման նախաձեռնողներից է եղել:
Ապրիլի 1-ին տեղի ունեցավ Մանկապատանեկան գրքի շաբաթի բացումը Գեղարքունիքի Գավառ քաղաքում: ՀԳՄ նախագահը տեղեկացրեց, որ մարզպետարանի հետ պայմանավորվածություն կա մշտապես գրողների հետ հանդիպումներ կազմակերպել մարզի համայնքներում, դպրոցներում: Մանկապատանեկան գրքի շաբաթի առթիվ մոտ 30 գրող հանդիպում ունեցավ մի շարք դպրոցներում: ՀԳՄ մարզային կառույցները՝ Լոռին, Շիրակը և մյուսները ևս գրադարաններում, դպրոցներում կազմակերպել են նմանատիպ հանդիպումներ: Շաբաթի փակումը տեղի ունեցավ ապրիլի 8-ին, Խնկո-Ապոր անվան գրադարանում:
Էդ. Միլիտոնյանն անդրադարձավ Վահագն Դավթյանի 100-ամյակին նվիրված միջոցառումներին՝ նշելով, որ որոշակի ծրագիր է կազմվել ու ներկայացվել ԿԳՄՍ նախարարությանը և քաղաքապետարանին: Հարցերից մեկն էլ վերաբերում էր Վահագն Դավթյանի անունով դպրոցի անվանակոչությանը:
Գրադարաններում, համալսարաններում տեղի են ունեցել հանդիպումներ, նոր գրքերի շնորհանդեսներ:
Էդ. Միլիտոնյանն անդրադարձավ Վ. Բրյուսովի անվան համալսարանի հետ ստորագրած հուշագրին, ըստ որի՝ տարվա ընթացքում թարգմանիչների խմբերը պրակտիկա են անցկացնելու ՀԳՄ-ում, որոնց հետ աշխատելու են մեր թարգմանիչները: Նույնատիպ պայմանավորվածություն կա նաև ԵՊՀ-ի ռոմանագերմանական ֆակուլտետի հետ: Հուշագիր է ստորագրվել նաև ՀԲԸՄ-ի հետ, ըստ որի՝ կիրականացվի մինչև 27 տարեկան ստեղծագործողների մրցանակաբաշխություն, որը կամփոփվի հոկտեմբերին: Մրցանակակիրները կմասնակցեն հոկտեմբերին Ծաղկաձորում կայանալիք երիտասարդ ստեղծագործողների հավաքին:
Անդրադառնալով ժամանակակից գրողների աջակցության խնդրին՝ Էդ. Միլիտոնյանը տեղեկացրեց, որ հրատարակվելու է հինգ գիրք. մեկը՝ նվիրված Ե. Չարենցին, արձակի, պոեզիայի, մանկապատանեկան գրականության ժողովածուներ, և գիրք՝ նվիրված հայ-ռուսական գրական առնչություններին՝ խոհագրություն, էսսե և այլն:
ՀԳՄ նախագահը խոսեց նաև Շիրակի մարզպետ Նազենի Բաղդասարյանի և Գյումրու քաղաքապետ Վարդգես Սամսոնյանի հետ հանդիպման մասին, որի ընթացքում քննարկվել է նաև գրական բաժանմունքի հետագա աշխատանքները կազմակերպելու համար առանձին մշակութային հիմնարկ ձևավորելու խնդիրը:
Նիստի ընթացքում քննարկվեց անդամավճարների հարցը:
