Գեորգ ֆոն Զիգերսի հաստատող խոսքից. «Եվ մենք դա պետք է անենք արյամբ, քրտինքով և արցունքներով, եթե հարկ լինի: Քանի որ ոչ ոք մեր խնդիրը չի լուծի, Կոստանդնուպոլսից մինչև Անկարա և այնտեղից Դիարբեքիրով, Մոսուլով մինչև Բաղդադ և Պարսից ծոց: Կարող ենք կենտրոնական կայարանում գնացք նստել և մինչև Հնդկական օվկիանոսը չիջնել: Եվ այս ամբողջ ընդարձակ տարածքը կլինի գերմանական տիրապետության ներքո: Անշուշտ, մեր ֆինանսական գործընկերների՝ ֆրանսիացիների թույլտվությամբ»:
Անատոլ Ֆրանսի հետ զրույցից. «Տեսեք, ցանկացած բռնակալ անբարո է, որը շարունակ ձգտում է արդարացնել իր այլասերվածությունը: Երբ հանում է իր ոսկեթել ուսակապերը, համազգեստը կամ դիմակը, որն ամեն վայրկյան կրում է, քանի որ ցանկացած բռնակալ պետք է դիմակավորվի, փորձելու համար խաբել նրանց, ում վրա բռնանում է: Եվ վերջապես հայելու առաջ ինքն իրեն տեսնում է մերկ՝ մի մեծ ճիճվի կերպարանքով, որին չի կարող խաբել: Խորշում է ինքն իրենից և իր արտաքինից, բայց քանի որ անբարո է, չգիտե, թե ինչո՞ւ է խորշում… և, իմ բարեկամներ, Աբդուլ Համիդը անբարո արարած է, անբարոների, բռնակալների տիպար… Դուք մի շատ կարևոր բան ունեք՝ պատմական արդարացիություն: Ես չգիտեմ, թե ինչ տեղի կունենա մոտ ապագայում կամ ավելի ուշ, սակայն պատմության վճիռը անբեկանելի է, և համոզված եմ, որ ի վերջո դուք եք լինելու հաղթողները: Գուցե մենք չենք տեսնի այդ, բայց գիտենք, հասկանո՞ւմ եք: Մի նշույլ կասկած չունենք այս երկարատև ու հոգեմաշ պայքարի վերջաբանի հանդեպ… և այս հարցի լավն այն է, որ նրանք նույնպես դա գիտեն: Կփորձեն ամեն կերպ փոխել պատմության ընթացքը, անգամ բնաջնջել ձեզ… Բայց ոչնչի չեն հասնի, թերևս միայն կերկարաձգեն այդ պրոցեսը: Ի վերջո պարտվելու են, իսկ դուք՝ հաղթելու: Ինչի՞ կհասնեն հաջորդ բռնակալները և նրանց չարանենգ ելուզակները. միայն անմեղ մարդկանց տառապանքին, պյուռոսյան հաղթանակների, արհամարհանքի, որ հարուցում են անբարոները, և դեռ ավելին: Դուք ինձ կառարկեք, ասելով, որ ձեզ չի մխիթարում այն, որ պատմությունը ի վերջո յուրաքանչյուրին իր տեղը կմատնանշի: Ես, որ ընդամենը մի արտոնություն ունեցող դիտող եմ, ուրախ եմ, որ գտնվում եմ արդարության կողմում: Անկեղծ ասած, ինձ երբեք դուր չեն եկել բռնակալները ու ոչ էլ ճիճուները»:
Լատուրի մտորումներից. «Այսպես մեզ հրաժեշտ տվեց Անատոլ Ֆրանսը այդ երեկո Ժնևում: Ինձ հիացնում էր նրա սուր միտքը՝ նրա հստակ դիրքորոշումը: Ես էլ էի նույն կարծիքին: Ի վերջո կգան հաղթողները, թեև երբեմն շատ երկար սպասումը և սարսափելի իրադարձությունները այդ ճամփան դարձնում են անտանելի»:
Ֆրանսիացի Անտուան Մոնժի՝ հետախուզական ծառայության պետի հետ զրույցից. «Այսպիսով ունենք մի կայսրություն, որը ցանկացած գնով ուզում է փրկել իր մնացորդները: Քանի դեռ նրանց հաջողվում էր դաշույնը ձեռքներին արշավելով, քարշ տալով իրենց հնադարյան թնդանոթները, արյամբ և հրով նվաճել նոր երկրներ, ամեն ինչ լավ էր: Նրանք տիրապետում էին նվաճելու արվեստին, գործածելով հնագույն ռազմավարական մեթոդները. ահաբեկչությունը, բռնությունը, թալանը, սպառնալիքը: Ծախվող ադմինիստրացիայի սահմանած ծանրագույն հարկերով, բացարձակ արհամարհանքով բոլոր նրանց հանդեպ, որոնց արյունը օսմանյան չէ, անխտիր պատիժներով, շատ դեպքերում սպանդներ գործադրելով… արտոնյալ դասի հովանավորչությամբ, ի վերջո մի կրոնի միջոցով, որն իր ստեղծման օրից հակամարտության մեջ է քրիստոնեության՝ մեր միասնության գլխավոր տարրի հետ, ստեղծել է անկայունություն: Այդ ամենը խանգարել է, որ նա ևս դառնա Եվրոպայի երկրներից մեկը, որտեղ ահով են հիշում «թուրքին»: Համոզված եմ, որ եթե նրան չկանգնեցնեին Վիեննայում, հասած կլինեին Փարիզ, և գուցե այդ դեպքում մենք Էյֆելի աշտարակի փոխարեն կունենայինք երեք հարյուր մետրանոց մի մինարեթ:
1914 թվականին իրավիճակն այնքան լարված էր եվրոպական մայրաքաղաքներում, որ իրենց ապրելակերպում մարդիկ դարձան բավական ցինիկ և որոշեցին, որ ամենաճիշտը մեկ օրով ապրելն է, առանց սպասելու, որ մի բան փոխվեր, հաստատ ամեն ինչ վատթարանալու էր:
Հինգ միլիոնանոց բանակը, այդ թվում պահեստային զինծառայողները և զինամթերքը, որ նախատեսված էին կործանելու ցանկացած թշնամու, գերմանացիներին վեր էին դասում բարու ու չարի հասկացություններից:
Տարբեր մեկնաբանությունները բացառվում էին, քանի որ Գերմանիան այնքան մեծ գումար էր խաղի մեջ դրել, որ ցանկացած միջոց նրանց համար շահավետ էր: Այնպես որ, Թալեաթը, Էնվերը, Ջեմալ բեյը ու նաև նրանց կողմնակիցները՝ դոկտոր Նազըմը և դոկտոր Բեհաէդդին բեյը, իրենց կարող էին միլիոնատեր համարել, դրան գումարած այն լրացուցիչ երաշխիքը, որ նրանց Գերմանիայում սպասում էր ոսկեզօծ հանգիստ՝ գործունեության ավարտին: Անշուշտ այս ամենն արվում էր մեծ զգուշությամբ, քանի որ թուրք սպաների համար տարօրինակ կլիներ. չէ՞ որ նրանց չէին վճարում պարտք մնացած աշխատավարձերը»:
Դաշնակահար, կոմպոզիտոր Գասպար Բարիկյանի խոսքից. «Խոսում ենք այս մոլորակի ամենակարևոր երկրներից մեկի՝ Օսմանյան կայսրության ներկայացուցիչների մասին, որ մի քանի տարի առաջ հրճվում էին իրենց արդիականությամբ՝ Մերձավոր Արևելքում ֆրանսիական հեղափոխության ամենաառաջադեմ գաղափարների ժառանգորդները լինելու առումով… Ի՜նչ ցինիզմ: Ահա նրանք, ձեր առջև կանգնած, իշխանությամբ արբեցած, առանց մի բանից գաղափար ունենալու, քաղաքականության մեջ իսկական անասուններ, անասնական՝ պանթուրքիզմի ապուշ գաղափարներով բթացած, խաբելով իրենց սեփական ժողովրդին՝ բարձրագույն մարդկանց ազգ ստեղծելու գաղափարով, իսկ դրանում մեծ է գերմանացի կեղծ գիտնականների մեղքը,- այն իդեալականացած Թուրանում, որտեղ իբր թե հավաքվելու են բոլոր թուրքալեզու և թուրքացեղ ժողովուրդները: Մինչդեռ իրականում այսօր, եթե մի բան կա անելու, դա այն է, որ պետք է փորձեն վերացնել այս երկրի թշվառությունը, որտեղ մեռնում են երեխաների կեսից ավելին, շատ ծերեր մեռնում են սովից: Ես եղել եմ օսմանյան հպատակ ու սարսափելի ամոթ եմ զգում կատարվող այս ամենի համար:…. Ես, որ ճանաչում եմ շատ թուրքերի, կասեմ, որ նրանք արժանի չեն այդպիսի ղեկավարների: Այստեղ ամենուրեք կան լավ մարդիկ, բայց ապրում են վախով… Շատ եմ ցավում, որ Վագների պես մեծ կոմպոզիտորը նրանց խելքին է ընկել…
Այդ ժամանակ էլ հասան ամերիկացիները, այն կտրուկ պահին, երբ Եվրոպան այլևս ո՛չ ռեզերվներ ուներ, ո՛չ ուժ, ո՛չ էլ զորակոչիկներ: Հիվանդանոցները լեփ-լեցուն էին պատերազմի վիրավորներով, վերականգնվելու սուղ հնարավորություններով: Կույրեր և հաշմանդամներ թունավոր գազերից, տասնյակ հազարավոր զինվորներ թողել էին իրենց խորտակված կյանքերը խրամատներում:
Մեկ ու կես միլիոն հայեր այլևս չէին տեսնի արևի երես, չէին տեսնելու յուրայիններին ու չէին ունենալու կյանքի երջանիկ պահեր… Նրանց քշել, տարել էին չարիքի, ատելության, նախանձի, ընչաքաղցության, տգիտության քամիները, և աշխարհն հիմա ավելի վատն էր, ավելի թշվառ, ավելի մութ»:
(հատվածներ գրքից)