Սամվել Մկրտչյան

2002 թվականն էր, ամիսը՝ չեմ հիշում, բայց հրաշալի եմ հիշում այն օրը, երբ Սամվելը նվիրեց «Բիթլզ. Երգեր» փոքրիկ գրքույկը, որ կազմել էին ինքն ու Արամ Ուռուտյանը: Ասեմ, որ նվերս ստացա յուրահատուկ «քննությունից» հետո, միայն երբ համոզվեց, որ բիթլզները նաև իմն են ու կյանքիս անբաժան մի մասը: Ամիսը՝ չեմ հիշում, բայց այսօրվա պես եմ հիշում, թե ինչպես էր պատմում իր ալբոմների, հավաքած վիթխարի գրականության և երգերի նոտաների մասին… Գրքույկն ընդունեցի որպես անսպասելի ու սպասված պարգև, և իմ գրադարանում այն առանձնահատուկ տեղ ունի: Փետրվարի 25ին բանաստեղծ, թարգմանիչ Սամվել Մկրտչյանի ծննդյան օրն էր, նաև՝ «Գրական թերթի» գեղարվեստական խմբագիր Սամվել Մկրտչյանի ծննդյան օրն էր, գրադարակից վերցրի «Ուլիսի» կողքին հարմար տեղավորված գրքույկը… և հասկացա, որ «Գրական թերթի» ընթերցողի հետ միասին պետք է հիշենք նրան:

Կ. ԽՈԴԻԿՅԱՆ

 

ՋՈՆ ԼԵՆՈՆ

ՎԱՂՆ ԱՆՀԱՅՏ Է

Միտքդ անջատիր,

լողա հոսանքն ի վար.

Սա դեռ մահ չէ, սա դեռ մահ չէ:

Թող մտքերդ, հանձնվիր

դատարկությանը.

Այն շողում է, այն շողում է:

Որպեսզի տեսնես

ներքին իմաստը.

Այն լինելն է, այն լինելն է:

Սերն է ամեն ինչ և ամեն ոք:

Այն ճանաչելն է, այն ճանաչելն է:

Ականջ դիր գույներին

երազներիդ.

Սա ապրել չէ, սա ապրել չէ:

Կամ խաղա «գոյությունը»

մինչև վերջ.

Սկզբի մասին, սկզբի մասին,

սկզբի մասին…

 

ՈՉՄԻՄԱՐԴ

Ոչմիմարդ կա այս երգում,

Նստած իր Ոչմիերկրում

Ոչմիծրագրեր է մշակում

ոչ մեկի համար:

Չունի ոչ մի տեսակետ,

Չի մեկնում, չի դառնում ետ,

Մի՞թե նա նման չէ ինձ ու քեզ:

Ոչմիմարդ, ի՞նչ ես ուզում դու,

Ոչ մեկին էլ չես հուզում դու,

Ոչմիմարդ, աշխարհը

քոնն է ընդմիշտ:

Կույր է նա, ինչպես ոչ ոք,

Իր ուզածն է տեսնում լոկ,

Ոչմիմարդ,

տեսնո՞ւմ ես արդյոք ինձ:

Ոչմիմարդ, մի՛ փախչիր դու.

Ոչմիմտքից միշտ կառչիր դու,

Մինչև որ ուրիշ մեկը

ձեռք մեկնի քեզ:

Ոչմիմարդ կա այս երգում,

Նստած իր Ոչմիերկրում…

Գրեք մեկնաբանություն

Ձեր էլ․փոստի հասցեն չի հրապարակվելու։ Պարտադիր դաշտերը նշված են * -ով։

This site uses Akismet to reduce spam. Learn how your comment data is processed.