ՊՈՂՈՍ ՀԱՅԹԱՅԱՆԻ ՀԻՇԱՏԱԿԻՆ

Մեզանից հեռացավ անվանի արվեստաբան Պողոս Հայթայանը: Ծնվել էր 1936 թ. Բեյրութում, շուտով էլ ընտանիքով հայրենադարձվել Հայաստան և իր ամբողջ կյանքն ապրել այստեղ: Նա իր երկիրը սիրում էր ամեն բանից շատ և նրան անմնացորդ նվիրվեց իր ամբողջ զգացմունքներով ու գիտակցությամբ: Բացառիկ քաղաքացի: Իրեն համարում էր երկրի տեր ու ծառա, փորձում էր ամեն ինչ տալ և ոչ թե վերցնել, հպարտ էր իր հայկական արմատներով, ժամանակակից մի արմատ էլ նա էր՝ իր ազգանվան հայեցի հիմքով:
Նա ավարտել է Լենինգրադի (այժմ՝ Սանկտ Պետերբուրգ) Ի. Ռեպինի անվան գեղարվեստի ակադեմիայի արվեստաբանության բաժինը: Աշխատել է ՀԳԱԱ արվեստի և Երևանի Գեղարվեստաթատերական ինստիտուտներում, մեծ եղավ նրա վաստակը «Հայկական հանրագիտարանում», որտեղ գրեց ու խմբագրեց կերպարվեստի վերաբերյալ բազմաթիվ հոդվածներ, նմանապես ուշագրավ էր նրա ներկայությունը Հայաստանի պետական ազգային պատկերասրահում՝ իբրև գիտական գծով փոխտնօրեն: Պողոս Հայթայանը երկար տարիներ ղեկավարեց Հայաստանի նկարիչների միությունը՝ որպես վարչության քարտուղար և նախագահ: Թեև արդեն վատառողջ էր, սակայն մինչև իր վերջին օրերը նրան անհանգստացնում ու ոգևորում էին մեր մշակույթում կերպարվեստի ստեղծագործական գործընթացները:
Նա բարձրակարգ արվեստաբան էր և, միաժամանակ, լավ գիտեր հայ գեղարվեստական մշակույթը՝ ճարտարապետություն, թատրոն, գրականություն, նա այս ասպարեզների կարևոր մարդկանց համախոհ ընկերն ու բարեկամն էր: Հիանալի տիրապետում էր հայերիս պատմության կարևոր դրվագներին ու այս մասին խոսում էր ոգևորված և ըմբռնումով: Պարզ մարդ էր, նրան կարելի էր արագ մտերմանալ և սիրել, համարել քեզ հարազատ:
Ծանրակշիռ է Պողոս Հայթայանի արվեստաբանական ժառանգությունը, որը վերջերս ամփոփվեց նրա հոդվածների «Հայ կերպարվեստի կեսդարյա քրոնիկոն» գրքում: Չկա արդի կերպարվեստի նշանակալից որևէ երևույթ, որը վրիպած լինի նրա ուշադրությունից: Պողոս Հայթայանը արդեն մեզ հետ չէ, որ տասնամյակներ շարունակ թվում էր մնայուն ներկայություն, բայց մեզ հետ է նրա արվեստաբանական ժառանգությունը, որն անբաժանելի է հայ կերպարվեստագիտության վերջին կեսդարյա տարեգրությունից:
Մեզ հետ է նրա լուսավոր հիշատակը:

ԵՐՎԱՆԴ ՂԱԶԱՆՉՅԱՆ, ՌՈԲԵՐՏ ԷԼԻԲԵԿՅԱՆ, ԵՐՎԱՆԴ ԳՈՋԱԲԱՇՅԱՆ,
ՅՈՒՐԻ ՊԵՏՐՈՍՅԱՆ, ՀԵՆՐԻԿ ԷԴՈՅԱՆ,
ՄԱՐՏԻՆ ՄԻՔԱՅԵԼՅԱՆ,
ՍԱՐՈ ԿԱԼԵՆՑ, ԱՐԱՄ ԳՐԻԳՈՐՅԱՆ,
ՌՈՒԲԵՆ, ՌԱՖՖԻ, ՆՈՐԱՅՐ ԱԴԱԼՅԱՆՆԵՐ

Գրեք մեկնաբանություն

Ձեր էլ․փոստի հասցեն չի հրապարակվելու։ Պարտադիր դաշտերը նշված են * -ով։

This site uses Akismet to reduce spam. Learn how your comment data is processed.